Popularizejūt latgalīšu rokstu volūdu jau catūrtū reizi nūteik pasauļa diktats latgalīšu rokstu volūdā. Tymā itūgod četri anekdoti, kū diktej Latvejis Instagram personeiba, pasuokumu vadeituojs i vīnkuoršais latgalīts Lauris Zalāns.

Diktatu vari nūsaklausēt ituos nedeļis raidejumā voi te - ej.uz/DiktatsLTG2020 - bet pīraksteitū tekstu puorbaudēt ite:

Muote grib vuoreit studzini i syuta dālu nūskrīt da mīsnīka pasavērt, voi ir cyuku kuojenis. Dāls atskrīn i soka: “Mam, es naredzieju, jam zuoboki beja kuojuos!”

Muote līk gulēt sovu mozū dālu. Dzīd jam mīga dzīsmeņu jau ūtrū stuņdi, bārns kai naguļ, tai naguļ. Beiguos juos dieleņš naiztur i soka: “Mam, tu cīši šmukai dzīdi, bet es grybu gulēt!”

Andris soka sovam draugam Juram: “Dzierdieji, školuotuoja veseleibys stuņdē stuosteja, ka školānim ir juoguļ ostonis stuņdis.” Draugs atsoka: “Kai mes varim gulēt ostonis stuņdis, ka stuņžu sarokstā ir tikai septenis?”

Muote vaicoj dālam: “Kuknē iz golda stuovēja diveji torta goboli. Deļkuo niule ir tikai vīns? Tu maņ vari paskaidruot?” “Varu! Tī beja tymss, i es tuo ūtruo gobola naredzieju,” atsoka dāls.

Teksts sastateits, īvārojūt Vaļsts volūdys centra 2007. godā apstyprynuotūs Latgalīšu raksteibys nūsacejumus, kuri daeinami ite - likumi.lv.

Diktatā pīļaunama divskaņa “uo” apzeimuošona ari ar “ō”.